養咗隻貓，改名用你提議過嗰個

上個月領養咗隻貓，三色花貓，好黐人。

改名嗰陣諗咗好耐。諗起你以前成日話想養貓，連名都諗定咗。「如果係女仔就叫麻糬，男仔就叫拖肥」。

我呢隻係女仔，所以我叫佢麻糬。

朋友上嚟我屋企，問我做乜改個咁嘅名。我話「因為佢圓碌碌，好軟熟，似麻糬」。呢個係事實，但唔係全部事實。

麻糬而家成日跳上我張床，踩我個肚，朝早六點就喵我起身餵佢。佢唔知自己個名有個故事，唔知以前有個人好想好想養佢。

我有時攬住麻糬，諗：如果你見到佢，一定會好開心。可惜你唔會見到。但唔緊要，我會好好照顧佢，用你改嘅名，叫佢一世。