朋友結婚，我想像過你著婚紗

上個禮拜去咗大學同學嘅婚禮。

新娘由教堂門口行入嚟嗰下，全場靜晒。婚紗好靚，拖尾好長，佢笑得眼都紅晒。

我忽然諗起你。你著婚紗會係點樣？你會揀魚尾定公主款？你會唔會緊張到笑唔出，定係由頭笑到尾？

以前我哋有講過結婚。你話想要個草地婚禮，唔要大排筵席，淨係請最親嗰班朋友。我話我想睇你著婚紗，你話「你到時唔準喊呀」。

結果我冇機會睇你著婚紗。可能有一日，我會喺朋友嘅FB或者IG見到——你著住婚紗，企喺另一個人旁邊，笑得同我想像中一樣靚。

到時我會like個post，然後熄電話，煮個麵食。因為我知，嗰個故事入面，個男主角已經唔係我。