你以前成日話我唔識表達

你以前成日話我，「你把口真係唔識講嘢」。

你喊嗰陣我唔識安慰你，淨係坐喺隔離遞紙巾。你開心嗰陣我唔識讚你，只係喺旁邊笑。你問我愛唔愛你，我話「你唔知㗎咩」。

我以為行動就夠。接你放工、陪你睇醫生、記住你M到嗰幾日唔食生冷嘢。但你要嘅，可能係一句「我好愛你」。

分手嗰日，你話「我唔知你想點」。我望住你，好多嘢想講，但最後一句都冇講。因為我唔知點樣將心入面嗰啲嘢變做說話。

而家先明，原來有啲嘢唔講出口，對方真係唔會知。你以為佢明，但其實佢只係不停咁估。

可惜我明得太遲。而家我想講，但你已經唔喺度聽。